399. De sancta Rictrude.

la. Hac in die plebs festiva
Laeta mente, voce viva
Det cantus laetitiae;

1b. Psallat digne concrepando,
Diem festum celebrando
Rictrudis egregiae.

2 a. Haec decenter et attente
Sponso moram faciente
Stat ornata lampade ;

2 b. Sponsus venit, haec intravit,
Sponsus eam decoravit
Auro texta cyclade.

3 a. Mente munda, corde mundo
Militavit in hoc mundo
Ceu mater familias:

3 b. Justum sibi fecit gressum,
Viri sui post decessum
Non quaesivit nuptias.

4 a. Sancta prole fit beata,
Proles ejus Deo grata
Actu, verbis exstitit:

4b. Deum sequens veritatem
Multis aegris sanitatem
Suffragatrix praestitit.

5 a. Claris orta natalibus,
Honestis alta moribus,
Tres genuit filias:

5 b. Hlae Deo consecratae
Prima necant in aetate
Carnales spurcitias.

6 a. Maurontus vita nobilis,
Caelebs, modestus, humilis,
Fuit illi filius:

6 b. Lege spreta conjugii
Sub arce diaconii
Vixit vir egregius.

7 a. Felix mater tantae prolis,
Ad adspectum veri solis
Semper habens oculum,

7 b. Sponsa sponso non fraudatur,
Sed cum sponso gloriatur
Post vitae curriculum.

8 a. Nos, qui diem tantae matris
Collaudamus, summi patris
Benedicat dextera,

8 b. Et purgatos a peccatis
Pater summae bonitatis
Collocet in aethera.