400. De sancta Rictrude.

1. Solemnizet plebs devota
Corde laeto, mente tota,
Interna laetitia.

2 a. Vox canora solvat ora,
Gratiora sint in hora
Gratulandi gaudia.

2 b. Hac in die pangat pie
Noster chorus concanorus
Rictrudis praeconia.

3 a. De Vasconum stirpe clara
Prodit ista Deo cara
Factis, fama, moribus.

8 b. Annos virgo sortita nubiles
Apud viros fit nota nobiles
Forma, vita, laudibus.

4a. Nubit duci Duacorum,
Viro sancto, viro morum,
Viro summae indolis.

4 b. O quam felix copula,
Quam non carnis macula
Sed spes sanxit sobolis.

5 a. Maritata fecundatur,
Fecundatae proles datur,
Mas unus, tres filiae:

5 b. Mas in sexu digniori,
Natae imbecilliori
Jubar exstant patriae.

6 a. Prima student ab aetate
Venerari sanctitate
Nomen Christi celebre,

6b. Morum pollent gravitate
Eelegata voluptate
Carnalis illecebrae.

7 a. Ab Arianis trucidatur

Dux et a Christo coronatur
Vivens gloriosius,

7 b. Conjux sancta viduatur,
Viduata famulatur
Deo diligentius.

8 a. Haec soluta lege thori
Haeret viro meliori,
Christo, super omnia ;

8 b. Crescit fervor animi,
Crescunt motus optimi,
Vigor, virtus, gratia.

9 a. Haec est nova Sareptana
Ligna legens fide sana,
Typum crucis faciens:

9 b. Haec Noemi Ebimelech,
Haec cassatrix Abimelech
Fragmen molae jaciens.

10 a. Haec est vitrix Holofernis,
Ima spernens pro supernis,
David sequens pro aeternis,
Abigail altera.

10b. Haec est neptis Mardochaei,
Sunanitis Elisaei,
Haec Jael Haber Cinaei,
Clavum tenens dextera.

11a. O Rictrudis,
Quae nos trudis
Ad directa,
Praeelecta,

Tuis favens famulis,

11b. Gloriosa,
Gratiosa,
Insignita,
Redimita

Signis et miraculis.

12 a. Ave, portus miserorum,
Consolatrix egenorum,
Spes moerentum pupillorum,
Dulce refrigerium.

12 b. Ave, decus matronarum,
Flos et gemma viduarum,
Aufer taetrum et amarum
Gehennae supplicium.

13 a. Jesu clemens, Jesu bone,
Hujus obtentu matronae
Constitutis in agone
Nobis confer et appone
Gratiae subsidium.

13 b. Ut finita et completa
Temporalis vitae meta
Post transcursa mundi freta
Detur nobis quies laeta
Et perenne gaudium.