411. De sancto Stephano.

la. Cordis et vocis organum
Levitam laudet Stephanum
Die ista,

1b. Lapidatum a perfidis
Contemptu veri lapidis
Die ista.

2 a. Heri terrae splenduit
Lux de coelis,
Lucis stolam induit
Vir fidelis
Die ista.

2 b. Heri Christum protulit.

Virgo mater,

Istum coelis intulit

Deus pater

Die ista.

3 a. Heri mundo rex coelorum,
Miles coelo natus est
Die ista,

3 b. Dum furore Judeorum
Martyr lapidatus est
Die ista.

4 a. Plenus fortitudine,
Sancto fervens flamine
Certat cum incredulis
Die ista.

4b. Infideles arguit,

Fidem veram adstruit
Signis et miraculis
Die ista.

5 a. Dum disceptant

cum levita Pharisaei,
Intuenti

coelum apertum est ei
Die ista.

5 b. Jesum videt

ad dexteram Dei stare,
Qui fidelem

suum facit triumphare
Die ista.

6 a. Fremit gens incredula,
Dum visa miracula
Testis verus asserit
Die ista.

6 b. Dissecatis cordibus,

Pressis stridens dentibus,
Saxis sanctum atterit
Die ista.

7 a. Heri rex descendit,

Ut servum redimeret,
Et miles ascendit,
Ut regnum assumeret,
Die ista.

7 b. Sui regis ortum

Jure miles sequitur,
Dum pro rege pugnat
Et ad vitam oritur
Die ista.

8 a. Flete, gentes perfidae,
Duriores lapide,
Quae coelesti Jaspide
Coronatum lapidastis
Die ista.

8b. Non vindictam replicat
Nec ut reos judicat,
Sed pro vobis supplicat,
Cujus membra conquassastis
Die ista.

9 a. O martyr inclite,
Miles emerite,
De peccati cespite
Nos eruas.

9 b. Et tuis precibus
Mundanis faecibus
Mundos coeli sedibus
Restituas.