412. De sancto Stephano.

la. Stephani martyrium
Agmina psallentium
Laudent et credentium
Verus amor.

1b. O quam magnum gaudium,
Quam magnum solatium,
In ore fidelium
Cordis clamor.

2 a. Hic primus martyrium
Post factorem omnium
Sumpsit et ad bravium
Sublimatur.

2b. Ubi choro civium
In coelo lactantium
Per carnis supplicium
Sociatur.

3 a. Hic pro lapidantibus
Fixis terrae genibus
Et expansis manibus
Sic oravit:

3 b. O Jesu, ne punias
Horum ignorantias,
Post dans Deo gratias
Expiravit.

4 a. Quam magna devotio,
Quam dulcis oratio,
Orat et pro vitio
Peccatorum.

4 b. Exemplum in propio
Cepit Dei filio,
Dante se pro pretio
Populorum.

5 a. Qui passus est ictibus
Lapidum ab hostibus,
Nos reddat cum laudibus
Creatori.

5 b. Et nos suis precibus
Ducat cum martyribus
Et det nobis omnibus
Bene mori.