414. In Inventione s. Stephani.

la. Psallat Christo chorus iste
In honorem agonistae
Sanctissimi Stephani,

1b. Collaetetur in tropicis,
In canticis angelicis
Non jubilo inani.

2 a. Vox consona puro cordi
Concinat cantu concordi
Melos propulsans coelum,

2 b. Ab hac laude non sit exsul
Nicodemus nec sit procul
Gamaliel, Abibon.

3 a. Dies est haec laetitiae,
Nam illorum est hodie
Sanctorum inventio,

3 b. Pace mundus hac fruitur,
Aegris salus refunditur,
Luctus cedit gaudio.

4 a. Sacratae legis amator,
Gamaliel, Pauli doctor
Et particeps coronae,

4 b. Luciano dormitanti,
Strato suo quiescenti,
Patet in visione.

5 a. Virga, manu quam tenebat,
Ter feriens hunc monebat
Ex nomine vocando,

5 b. Corpora ut sancta quaerat
Ac in Sion sanctam condat
Affatim imprecando.

6 a. Sed dubius visionis
Haesitavit, ne daemonis
Illa esset visio ;

6 b. Propterea orat Christum,
Si visio est per ipsum,
Appareat tertio.

7 a. Sic secundo huic apparet,
Nec hac vice illi paret,
Nec agit, quod petitur.

7 b. Rursum patens hunc repetit
Cur non egit, hunc impetit
Et minis exquiritur.

8 a. Ille moras tunc repellit
Nec amplius illum fallit,
Prius sed sciscitatur,

8 b. Corpora cum invenerit,
Stephani quomodo, quaerit,
Corpus recognoscatur.

9 a. Vides, inquit, hos calathos,
Aureos rosis repletos
Quartamque argenteum,

9 b. In quo rubentes sunt rosae,
Reliquiae sunt famosae
Stephani, juxta eum

10 a. Nicodemi, auditoris
Jesu Christi salvatoris
In evangelio,

10b. Et quem vides croco plenum,
Abibam monstrat serenum,
Cum quo ego dormio.

11a. Mane facto hoc revelat,
Nec unicum verbum celat
Johanni pontifici.

11b. Ambo simul sine mora
Sanctorum levant corpora
Laude cum multiplici.

12 a. Tantus odor tunc flagravit,
Qui in coelum emanavit,
Quod corpora tunc sanavit
Sexaginta et tria.

12b. Caecis lumen infunditur,
Mutorum lingua solvitur,
Auditus surdis panditur,
Fugantur daemonia.

13 a. Gressus claudis tunc redditur
Languor omnis reprimitur,
Quod quis petit, hoc fruitur,
Quis audivit talia!

13 b. O Stephane, martyr Christi,
Qui Judaeos devicisti
Et Domini meruisti
Primus bella certare:

14 a. Nunc ad tua auxilia
Currentes te prece pia
Poscimus, ut coelestia
Facias penetrare.

14b. O consocii coronae,

Nunc certantes in agone,
Participes vitae bonae
Faciatis jugiter.

15. Ut possimus trabeati
Et coronis laureati
Regem videre beati
Cum vobis perenniter.