421. De sancto Trophimo.

la. Gratuletur plebs fidelis,
Gaude, tellus, gaudet, caelis
Angelorum curia ;

1b. Die ista laudi detur
Et felicis renovetur
Trophimi memoria.

2 a. Praesul noster Asianus,
Vita pollens, verbo sanus
Pauli fuit socius,

2 b. Hanc ad urbem destinatus
Verbum Dei ad hoc datus
Praedicavit ocius.

3 a. Arelatis gens iniqua,
Prius Deo inimica,
Caput idolatriae,

3 b. Contemplatur hunc docentem,
Ferox ferit innocentem
Ducta zelo fnriae.

4a. Dum insistit praedicando
Importune iterando
Luto, fuste caeditur

4b. Falsitatis clamant testes,
Laniantur ejus vestes,
Huc et illuc pellitur.

5 a. Christe, mortis subjugator,
Vitae gloriosae dator,
Reis optans veniam

5 b. Arelaten tunc respexit,
Duros frangens malos flexit
Trophimi per gratiam.

6 a. Sed cur loqui moror plura,
Molliuntur corda dura,
Baptizantur pariter,

6 b. Templa foeda destruuntur,
Loca sacra construuntur
A conversis noviter.

7 a. Hinc ad partes Galliae
fides Christi fluxit,
Et eis per Trophimum
vera dies luxit.

7 b. Iste Paulo Trophimus
haesit imitando,
Pauli dogma docuit
gentes praedicando.

8 a. Hic multarum titulis
claruit virtutum,
Hic nobis ad superos
iter parat tutum.

8b. Hunc pulsemus precibus,
Huic dentur vota,
Huic clerus concinat
pura mente tota.

9 a. Nunc, patrone, pastor bone,
populum conserva,
Hujus vires hostium
penitus enerva

9 b. Actu, prece, ut quiete

cum Christo regnemus,
Et laudes cum angelis
in aetemum demus.