436. De sancto Vincentio.

la. Adest dies gloriosa,
In qua rubicunda rosa
Vernans coelo redditur.

1b. Dum Vincentii spinosa
In stipite mors poenosa
Flore fides colitur.

2 a. Minister fit Valerii,
Qui Daciani impii
Errorem redarguit,

2b. Sed praesuli exsilii,
Ministro martyrii

Praeses poenam tribuit.

3 a. Vicentii denudantur
Viscera, sale fricantur
Membra in equuleo,

3 b. Ferro carnes concremantur
Sanguine prunae rigantur
Sub lectulo ferreo.

4 a. Post carceres, patibulum,
Sanctum ejus corpusculum
Lecto molli locatur,

4 b. Sed ibi vincens saeculum
Ad supremum oraculum
Dormiens sublimatur.

5 a. O quam debet venerari
Vincentius et laudari
A cunctis fidelibus,

5 b. Qui meruit praeservari
A feris, etiam mari
Et a malis omnibus.

6 a. O Vincenti, martyr Dei,
Defensor sacrae fidei,
Ora Deum jugiter,

6 b. Ut in loco requiei,
Aeterni quoque diei
Vivamus perenniter.