14. De sancta Cruce.

1 a. Salve, signum sanctae crucis,
Lignum vitae, signum lucis,
Mundi ferens pretium.

1 b. Poena Christo, crux, es gravis,
Sed triumpho fis suavis,
Vetus vincens proelium.

2 a. Agni Dei mors occisi
Cruce clave paradisi
Reseravit ostium;

2 b. Caput hostis est contritum ;
Dum est iusto plus petitum,
Perdit privilegium.

3 a. Salve, signum nobile
Deo dedicatum,
Angelis amabile

Dans his reparatum,
Nobis delectabile
Tollens cruciatum.

3 b. Christe, male venditos
Cruce redemisti,

Servituti subditos
Liberos fecisti,

Naufragio deditos
Ad portum duxisti.

4 a. Salve, crux, iudicii
Die praesentanda,

Nunc scutum refugii,
Arbor adoranda,

Qua pax postliminii
Fuit reformanda.

4 b. Signa nos signaculo,
Crux, tuae virtutis,

Sic ab hostis spiculo
Protege salutis,

Ut futuro saeculo
Dux sis te secutis.