204. De sancto Ethelwoldo Ep. winton.

1. Dies sacra, dies ista,
dies valde gloriosa,

2 a. Qua beati patris sancta
Aethelwoldi anima,

2 b. Exuta corporis gleba,
laeta petit aethera.

3 a. Hic itaque ex prosapia
puer editus orthodoxa
et ingenua,

3 b. Ab ipsa sacra infantia
multa futurae sanctitatis
dat insignia.

4 a. Ad Dei promptus obsequia,
universos morum praecellit
merito et gratia,

4b. Benignus [ac] mentesincera,
vigiliis carnem edomans
et multa inedia.

5 a. Caritatis gratia

ac pietatis dulcedine
prae omnibus adfluebat,

5 b. Plenus sapientia

discretionis fruebatur
divinitus prudentia.

6 a. Monachorum disciplina
eruditus, sanctimonia
informatus, caelestia
meditatur exercitia.

6 b. Summas oboedientia,

propter clara vitae merita
monacborum promeruit
fieri pater atque abba.

7 a. Arbor fecunda
tanta virtutum
floruit gratia

7 b. Urbe Wentana
ut praesulari
functus sit infula.

8 a. Clericos quorum perversa
erat vita,
pellit ab ecclesia ;

8 b. Monachos, quorum sanctitas
magna erat,
servituros adgregat.

9 a. Fide fortis hausta
veneni pocula superat.

9 b. Et de templi alta

ruentem monachum liberat.

10 a. Multa struit coenobia,
thesauros evacuat,
De famis angustia
egenorum
eripit millia;

10 b. Furem solo verbo ligat,
confitentem absolvit,
Semiplenum olei
vas perditum
reddit (et) accumulat.

11 a. Clara confessorum gemma,
veniam
pie nobis impetra,

11b. Ut nos tecum (in) sempiterna
regnare
mereamur patria,

12. In qua felix sollemnizas
per aeterna saecula.