199. De sancto Eligio.

1. Sexus omnis convolet
Ad sollemne gaudium,
Ara cordis immolet
Laudis sacrificium.

2 a. Praesens specialius

Festum colat contio,
Quam munit Eligius
Sui privilegio.

2 b. Linguae, manus, oculi
Disponens officia
Dei, cleri, populi
Praeminebat gratia.

3 a. Lingua Dei laudibus
Manus elemosinis,
Oculus moralibus
Insistebat paginis.

3 b. Vas excoxit intime
Fornacis igniculo,
Quod effudit animae
Fulgorem carbunculo.

4 a. Praeter utensilia

Mensis apta regiis
Vasa cudit propria
Sanctorum reliquiis.

4 b. Hoc insigne tempora
Seducunt Eligii,
Quod invenit corpora
Beati collegii.

5 a. O Eligi, vas divinum,
Sine vite creas vinum,
Sacrae manus gratia.

5 b. Benedicis, et repletur
Vacuum vas, ut probetur
Virtutis potentia.

6 a. Quibus ludos interdixit
Vox pastoris, ut afflixit
Spiritali gladio,

6 b. Sic in eos vindicavit,

Quod per annum mancipavit
Daemonum supplicio.

7 a. Quam timendum fuditverbum,
Quo procacem et superbum
Mox stravit, ut pertulit.

7 b. Silvae suae ius evicit,

Cum sic verbo verbum vicit,
Vim virtute reppulit.

8 a. In correptos ratione
Reprimebat ultione

Vir prudens et strenuus.

8 b. Hoc campana probat [muta],
Arbor succo destituta,
Sacerdos praemortuus,

9 a. Compeditus absolutus,

Caecus videns, loquens mutus,
Sanus factus languidus ;

9 b. Quin sunt eius testes veri,
Nemo potest diffiteri
Nec hostis nec invidus.

10 a. Quod de multis prophetavit,
Ipse suum revelavit
Et praedixit obitum.

10 b. Signum crucis ante vexit
Ignis sphaeraque transvexit
Ad caelos emeritum.

11a. Cures ergo, pastor bone,
Ut hunc gregem a praedone
Christi servet dextera,

11b. Pietate, non vindicta,
Miserante, non districta
Lance libret opera.