249. De sancto Iohanne Ev.

1 a. Caelum laudes moduletur,

Orbis totus iucundetur

Iucundo tripudio.

1b. Caeli iubar, mundi lumen,
Lignum vitae, divum flumen
Vi caelestis luminis.

2 a. Fons doctrinae hic Iohannes,
Qui caelestes fudit amnes
Per totam ecclesiam,

2 b. Paranymphus novi regis,
Novus doctor novae legis,
Tuba, praeco, signifer.

3 a. Hic electus, praedilectus
Flos pudoris, sal dulcoris,
Verbi summi legifer,

3 b. Velut avis transvolavit
Caeli summa, hic intravit
Et transcendit omnia.

4 a. Fontem lucis contemplatur,
Lux a luce, admiratur
Raptns ad caelestia,

4 b. Alte volans, alte videns,
Alte tonans, alte dicens
Verbum in principio.

5 a. O caelestem symphonistam,

O mirum evangelistam,

O dulce eulogio !

5 b. Arca novi testamenti,
Splendor veri firmamenti,
Aquila mirabilis.

6 a. Cernit verbum patre natum,
Vidit verbum incarnatum,
Beniamin amabilis,

6 b. O quam alta, quam serena,
Quam devota, quam amoena,
Eius edit digitus.

7 a. Ut sol fulget in decore,

Sponsi fervet in amore,

Corde, lingua, opere.

7 b. Super omnes hunc amavit
Iesus, multa cui donavit
Speciali munere.

8 a. Supra pectus Iesu Christi
Caput ponens exhauxisti
Secreta caelestia,

8b. Vas ferventis cum intrasti
Olei, vim superasti
Christi fultus gratia.

9 a. Iuxta crucem extitisti,
Et in matrem recepisti
Matrem regis gloriae.

9 b. O thesaurum super aurum
Pretiosum, speciosum
Fontem omnis gratiae !

10 a. Flos cum flore conversatur,
Lux a luce conservatur,
Quam felix consortium !

10 b. Iesu bone, Iesu pie,
Prece huius et Mariae,
Dum hicmundus pertrahit,

11. Nos conserva, nos guberna,
Ne nos trahat ad inferna
Daemonis versutia.