15. De Quinque Vulneribus DN.

1 a. Plangat Sion salvatorem,
Plangat sponsum et rectorem,
Quia caedit grex pastorem,
Planctu amarissimo.

1b. Plangat culmen honestatis,
Quia proles deitatis,
Dux et decus probitatis,
Traditur supplicio.

2 a. Plangat virgo suum natam,
Nudum, caesum, flagellatum,
Caput spinis coronatum ;
Squalet mater filio.

2 b. Plangat corpus cruentatum,
Vivum cruce conclavatum,
Manus, pedes vulneratum;
Pendet in patibulo.

3 a. Tanta Christus toleravit,
Heloi, Heloi proclamavit,
Lama sabacthani provulgavit
Mortis in periculo.

3 b. Plangat virgo fel murrhatum
Nato sitienti datum;
Mox, ut dicit ''Consamtnatum,
''Datur exterminio.

4 a. Postquam matrem commendavit,
Soli patri se donavit,
Spiritum sic exhalavit
Redimendo populo.

4 b. Sol et luna obscuravit,
Miles latus perforavit,
Sanguis, aqua emanavit
Eius ex corpusculo.

5 a. Terra, saxa tremuerunt,
Et humati surrexerunt
Multisque apparuerunt
Exspirante Domino;

5 b. Plangit caelique regina,
Peccatorum medicina,
Plangit natum in ruina
Cum iniquo populo.

6 a. Virgo compar passionis,
Cor pertransit mors mucronis,
Ceu sunt dicta Simeonis,
Passa est in animo.

6 b. Virgo materque Messiae,
Flos virtutum, vas usiae,
Ut in threnis Ieremiae
Languet rosa lilio.

7 a. Virgo, mater Christi Iesu,
Scribitur in threnis: ''Vau,
Iod, heth, teth, lamed, tau
''Moysi pentatico.

7 b. Virgo, mater dolorata,
Super caelos coronata,
Sis pro nobis advocata
Tuo unigenito.

8 a. Celsitudo Iesu Christi,
Te quam vilem praebuisti,
Probra multa sustulisti,
Pro nostro flagitio !

8 b. Tu, qui tanta passus dire,
Cum instabit dies irae,
Fac cum sanctis pertransire
In perenni gaudio.

9. Iesu, nostri miserere,
Prece matris nos tuere,
Fac nos, Iesu, te videre
In tuo palatio.