16. De Quinque Vulneribus DN.

1 a. Cenam salutiferam

salvator curavit,
Qua se et apostolos

ipso se cibavit,
Suam lamentabilem

mortem depalavit,
Quam Iudas commercio

turpi coniuravit.

1b. Hortum intrat anxius,

humi se prostravit,
A se calix transeat

Deum invocavit,
Sed, quominus fieret

mens patris, oravit ;
Pro sudore sanguinem

orans desudavit.

2 a. Audax dedit osculum

Iudas ori Christi,
Ille: " ad quid,": inquit, "huc,

amice, venisti?
Falso tradis osculo

me, quem vendidisti ?
Hinc in Iesum irruunt

Satbanae ministri.

2 b. O scelus ! qui variis

te dilexit modis,
O virus, trux furia !

Deum tuum odis?
Siccine malitiae

intricaris nodis,
Aere captus, proh nefas,

caeli regem prodis?

3 a. Ad Pilatum ducitur,

falso accusatur ;
Magistratus populi

intrat, debacchatur
Et gravis nequitiae

Iesum criminatur;
Alapis et colaphis

innocens vexatur.

3 b. Dum Christum dimittere

Pilatus conatur,
Iudaeorum furia

magis inflammatur;
Tum caelum terribili

murmure foedatur,
Cum clamat plebs impia:

"Vah, crucifigatur!"

4 a. Traditur militibus,

vinctus verberatur,
Plagis atrocissimis

insons cruentatur,
Luditur, conspuitur,

spinis coronatur,
Pronis humi genibus

vane honoratur.

4b. Caro Dei tenera

sancti salvatoris
Laceratur rigidi

flagello tortoris ;
Defluunt salvifici

flumina cruoris ;
Crudus, lacer populo

praesentatur foris.

5 a. Oppidi per medium

Iesus procedebat,
Et crucis patibulum

umeris ferebat ;
Ad fores, ad ostia

populus fluebat,
Sic eius confusio

neminem latebat.

5 b. In cruce suspenditur,

manus expanduntur,
Crudeli divortio

artus dissolvuntur,
Manus, pedes rudibus

clavis fodiuntur
Et ferro durissimo

cruci compunguntur.

6 a. Pendit cum latronibus

autor veritatis,
Immo, ipsa veritas

ut dux pravitatis,
Innocens cum impiis,

nostris pro peccatis
Ut offensae faceret

trinitati satis.

6 b. De siti conquestus est

et crucem tacebat,
Et acetum felleum

sensit, non bibebat,
Non tam prae doloribus

summis sitiebat,
Quam salutem sitiens

nostram expetebat.

7 a. Mortis victor moriens

fortiter clamavit,
Suum Deo spiritum

patri commendavit,
Dixit: "Consummatum est,"

caput inclinavit,
Ac emisit spiritum,

ditem spoliavit.

7 b. Aperitur lancea

latus redemptoris,
Extemplo fons profluit

undae et cruoris,
Peccatorum lavacrum,

sanitas languoris,
Unde nervos capiunt

sancti novi moris.

8 a. Flet virgo puerpera,

maeret, contristatur,
Simeonis gladium

senis meditatur,
Quo mens et virgineum

cor perterebatur,
Ut vel sic cum filio

crucem luat mater.

8b. Per haec Dei vulnera,

virgo, tui nati,
Aequo nos fac animo

hic adversa pati;
Si spiret prosperitas,

ne simus elati,
Assis, frenos obvii

moderare fati.

9 a. Iesu, per sanctissimam

tuam passionem
Morbos sana mentium,

per contritionem
Iustam demerentibus

reprobationem
Tua mors sat conferat

ad salvationem.

9 b. Recordare, moreris

vita propter vitium;
Cum iuste irasceris,

tempera iudicium ;
Si culpae memineris,

specta mortis pretium,
Et duc, quod redemeris,

in terram viventium.