EXPOSITIO TEXTUS.

B. Si autem super istos, etc. Deinde excludit idolalatras a communi-

catione hujus doctrinae : quia si divina doctrina de mysticis est super omnes doctos qui rationem sequuntur, multo magis est super indoctiores qui tantum sensum sequuntur, nihil supra sensibilia esse putantes, sed figurant sibi Deum imaginibus ex postremis in existentibus, sicut dicitur ad Rom. I, 23, quod mutaverunt gloriam Dei, in imagines volatilium et serpentium : unde putant quod Deus non sit aliquid melius quam illae impiae imagines, quas ipsi faciunt.

Et quia aliquis defendendo istum errorem posset dicere, quod de Deo., qui est omnium causa, oportet omnia affirmare, et ita quod Deus est homo, et debet in imagine hominis adorari, et similiter in imagine serpentis et aliorum. Respondet huic quaestioni faciens antipophoram, et dicit, quod Deus est causa omnium, et tamen essentialiter est super omnia : et ideo quamvis ponantur taliter omnium affectiones in ipso, tamen multo magis essentialiter omnia removentur ab ipso, quia ipse nihil est eorum : et illae negationes non sunt oppositae illis affirmationibus, quia non sunt secundum idem : sed oportet causam omnium ponere et super negationes et super affirmationes, quia per neutrum eorum comprehenditur quidditas Dei.