BALTH. CORDERII, S. J. INTERPRETATIO.

Hoc autem existimo significare divinissima et summa eorum quae cernuntur et intelliguntur, rationes quasdam esse quae subjiciant menti illa, quae sunt subjecta ei, qui universis antecellit ; quibus praesentia ipsius, quae omnem cogitationem mentis vincit declaratur, insistens tamquam in vestigiis summis intellectibilibus locorum ejus sanctissimorum ; ac tunc ab iis ipsis quae videntur, et ab iis quae vident, absolutus et expeditus, in caliginem vere mysticam incognoscibilitatis ingreditur, in qua omnes scientificas apprehensiones excludit, et in omnimode intactili et invisibili haeret, totus exsistens ipsius qui est ultra omnia ; neque ullius, neque suus, neque alterius, cum eo autem qui est penitus incognoscibilis, per vacationem omnis cognitionis, secundum meliorem partem copulatus, et eo ipso quod nihil cognoscit, supra mentem cognoscens.