18. De s. Facie Domini.

1. Salve, decus saeculi,

2 a. Impressum panniculo
nivei candoris,
Alleluia,

2 b. Datumque Veronicae
signum ob amoris,
Alleluia.

3 a. Salve, [sancta facies],
speculum sanctorum,
Quod videre cupiunt
spiritus caelorum;

3 b. Nos ab omni macula
purga vitiorum,
Consortes nos, quaesumus,
iunge beatorum.

4 a. Salve, splendor gloriae,
salus peccatorum
Vera, tu repraesentans
regem supernorum.

4 b. Restauratrix gratiae,
decus angelorum,
Te quaerunt respicere
animae iustorum.

5 a. Stella clara matutina,
Fulgens uti lux divina,
Quae es cura languidi;

5 b. Vitae nostrae medicina,
Nos in mundo a ruina
Serva, vultus Domini.

6 a. Imago haec beata

ex aeterno decorata,

6 b. Lumen funde cordium
ex vi[rtute] tibi data.

7 a. Salve, robur fidei

christianae nostrae,

7 b. Destruens haeretica,

quae sunt vitae vanae.

8. Horum adauge meritum,
Qui te colunt ad ultimum
Atque te credunt sane.

9 a. O nobile sudarium,
Nostrum esto solacium,
Eius memoriale,

9 b. Qui corpus assumpsit nostrum,
Verum gaudium et bonum
Atque donum finale.