23. In Resurrectione Domini.

1. Psalle lyrica
carmina

2 a. Iubilans Domino, turmula

2 b. Praesens, mera cum symphonia.

3 a. Ipsum nam

condecet laus, gloria,
Quem laudat
in caelo angelica
universa dignitas.

3 b. Is enim

caeli, terrae machinam,

Pelagus

atque ex nihilo, quae

sunt, creavit omnia.

4 a. Is deiectum
paradisicolam
reduxit ad aeternae
vitae pascua,

4 b. Carnem sumens

pro nobis humanam,
natus matre de vera
sancta Maria,
Virgine casta.

5 a, Hinc crucis mysterio

devastans mortem claustra
fregit infernalia,

5 b. Chirographum antiquae
praevaricationis
delens morte sua.

6 a. Sic surgens zabulo
triumphato
die tertia,

6 b. Quis fisus fuerat,
eius arma
aufert omnia
Forti dextera.

7 a. Eiusque cuncta spolia
diripiens
vehit secum ad astra

7 b. Angelicis agminibus
pastor bonus
constituens socia.

8 a. Quapropter huius in laude
pangite, gentes,
cum populis
iubilamina,

8 b. Ipsius cruore sacro
redemptae mortis
a vinculo
vita reddita
In poli aula.

9 a. Ubi pariter
laetemur semper
cum ovibus
ad patris dextram,

9b. Cum examine
supremo iudex
iudicabit
cuncta saecula
Flammis purgata.

10. Simul resonent
redempta: Fiat.