EXPOSITIO TEXTUS.

Hoc autem, etc.

Deinde exponit dicens : Hoc autem quod dictum est, puto significare, quod dicam, scilicet divinissima visorum et intellectorum, id est, ea quae videmus de Deo nobilissimis revelationibus, et alia quae intelligimus altissimis contemplationibus in hac vita, esse non Deum, sed quasdam rationes, id est, species subjectorum, id est, rerum quae subjiciuntur Deo excedenti omnia : subjectas, id est, inferiores Deo in ipsis nobilissimis creaturis et effectibus suis, et etiam per quae, divinissima, praesentia ejus, scilicet Dei quae est super omnem cogitationem materialium, est enim praesens omnibus effectibus suis et aliquo speciali modo effectibus gratiae vel gloriae : praesentia dico superveniens monstratur intelligibilibus summitatibus sanctisimorum locorum ejus, scilicet Dei, et dicuntur loca Dei, Angeli qui secundum sui supremas virtutes recipiunt Dei praesentiam in se supervenientem per suos effectus gloriae, in quorum lumine anima nostra divina videt, secundum quod ab ipsis de divinis Tunc , quando scilicet divinissima videt Moyses, absolvitur ab ipsis visis radiis, quia non sunt objectum contemplationis, et ab aliis secum videnti-

bus, quos dixit sacerdotes : unde dictum est aliis Exod. XXIV, 2 et 3 : Adorabitis procul..,. Solusque Moyses ascendet ad Dominum : et, sic remotus ab omnibus, intrat ad caliginem ignorantiae, de qua dicitur quia abierat Deus : quia nobis ignotus est, quae caligo vere est mystica, id est, occulta, in qua claudit Moyses omnes cognitivas susceptiones, id est omnes virtutes naturales animae per susceptionem cognoscentes, quae ab aliis remotae, sola divina caligine implentur, et sic fit per adhaesionem intellectus. Et dicit, non palpabili et invisibili, quia id quod sic invenit,neque sensibile est,neque intelligibile per comprehensionem : ipse, dico, sic,fit, existens omnis, id est, totus, ejus qui est super omnia, scilicet Dei, per omnimodam conversionem ad ipsum, et nullius praeter Deum existens, neque suiipsius, neque alterius : quia ad nihil praeter Deum convertitur : autem, id est, sed unitus secundum melius, id est, secundum meliorem modum suae unitionis, omnino ignoto, scilicet Deo, vacatione omnis cognitionis naturalis, quia ad alia non convertitur naturaliter cognita, sed ad solum Deum qui nulla cognitione naturali cognoscitur, et sic vacant naturales cognitiones : et eo quod, id est, in quantum nihil cognoscit, cum naturali cognitione super mentem cognoscens, id est, super naturam suae mentis lumine divino desuper infuso, quo mens supra se elevatur.