32. In Pentecoste.
Feria tertia.

1. Veni, sancte spiritus,
Nos perfunde caelitus
Rore novae gratiae.

2 a. Culpas nostras dilue,
Et nos manna complue
Verae sapientiae;

2 b. Sis nobis paraclitus
Et mundans medullitus
Lima conscientiae.

3 a. Igne nos examina,
Luce nos illumina
Dignae paenitentiae ;

3b. Munda mentis aream,
Lateres et paleam
Et lutum elimina.

4 a. Pietate solita

Nos afflictos visita,
Nostra delens crimina
Planta morum germina;

4 b. Sere semen gratiae,
Semen indulgentiae,
Semen patientiae,
Semen verae gloriae.

5 a. Supplicemus
Et oremus,

Ut te duce fortes stemus
In agro martyrii;

5 b. Occumbamus,
Ut vincamus,
Moriamur, ut vivamus
Tanquam strenuissimi.

6 a. Per te Christi passioni
Conformemur et agoni
Instantis militiae;

6 b. Per te Christo militemus
Et cum Christo festinemus
Ad palmam victoriae.

7 a. Cor, os, actus nostros munda,
Et fecundis nos fecunda
Rivis misericordiae
Et disciplinis fediae.

7 b. Da de caelis sacram numen
Et in terris verum lumen,
Nobis caecutientibus
Mentes illustra moribus.

8 a. Cum sis ardor caritatis
Et largitor pietatis,
Tuae nobis largitatis
Confer participium.

8 b. Plue nobis aquas mundas,
Aquas vivas et fecundas,
Formans nobis mentes mundas
Doctrinis caelestium.