Acta Apostolicae Sedis - Commentarium Officiale608

catholica, cuius visibilis Caput est Episcopus Romae ac Successor Petri, non

est quoddam complementum Ecclesiae particulari ab extra adveniens, sed

unum e principiis internis quibus ipsa constituitur, condicio Ecclesiae parti-

cularis, qua potiuntur venerabiles illae communitates christianae, defectu

tamen afficitur.17

Ex altera parte, plenitudo catholicitatis Ecclesiae propria, a Successore

Petri et Episcopis in eius communione gubernatae, propter divisionem chris-

tianorum impeditur in historia plene consummanda.18

5. Quaeritur: Cur textus Concilii et Magisterii subsequentis communitatibus

natis ex Reformatione saeculi XVI titulum Ecclesiae non attribuunt?

Respondetur: Quia secundum doctrinam catholicam hae communitates

successionem apostolicam in sacramento Ordinis non habent, ideoque ele-

mento essentiali Ecclesiae constitutivo carent. Illae communitates ecclesia-

les, quae, praesertim propter sacerdotii ministerialis defectum, genuinam

atque integram substantiam Mysterii eucharistici non servant,19 secundum

doctrinam catholicam Ecclesiae sensu proprio 20 nominari non possunt.

SS.mus Dominus Noster Benedictus PP. XVI, in Audientia infrascripto

Cardinali Praefecto Congregationis pro Doctrina Fidei concessa, supradicta re-

sponsa in Conventu Ordinario huius Congregationis deliberata, rata habuit,

confirmavit et publici iuris fieri iussit.

Datum Romae, ex Aedibus Congregationis pro Doctrina Fidei, die XXIX

mensis Iunii MMVII, in sollemnitate Ss. Petri et Pauli, Apostolorum.

Gulielmus card. Levada

Praefectus

e Angelus Amato, S.D.B.

Archiepiscopus tit. Silensis Secretarius

17 Cfr Congregatio pro Doctrina Fidei, Litt. Communionis notio, 17.3: AAS 85 [1993-II] 849. 18 Cfr Congregatio pro Doctrina Fidei, Litt. Communionis notio, 17.3: AAS 85 [1993-II] 849. 19 Cfr Concilium Oecumenicum Vaticanum II, Decr. Unitatis redintegratio, 22.3. 20 Cfr Congregatio pro Doctrina Fidei, Decl. Dominus Iesus, 17.2: AAS 92 [2000-II] 758.