58. In Missa de Humiliatione Christi.

Contra infirmitates.

la. Ad Iesu Christi gloriam
Dicamus, ad memoriam
Eiusdem ad martyrium:

1b. O homo, pensa, qualiter
Rex tuus ac quam graviter
Perpessus est suspendium.

2 a. Clavi, crux atque lancea,
Fel, arundo et spongia,
Sanguinis emanatio,

2 b. Flagella, sputa, verbera
Et columna et corona
Sunt dulcis contemplatio.

3 a. Ave, Iesu Nazarene,
Caritatis fons amoene
Effluens largiflue.

3 b. Miserere, rex serene,
Memorantum tuae poenae,
Mortis amarissimae.

4 a. Salve, caput inclinatum,
Despective coronatum
Spinis infidelium.

4b. Ave, corpus flagellatum,
Circumquaque cruentatum
Nostrum propter vitium.

5 a. Salve, beata facies,

Quae turpiter consputa es,
Subdita verberibus.

5 b. O corporis nudatio,
Iesu Christi clavatio,
Patiens in omnibus.

6 a. Ave, dextra Iesu manus,
Cuius vulnus adoramus
Corde devotissimo.

6 b. Per te detur, ut vincamus
Hostes tres et gaudeamus
In die novissimo.

7 a. Salve, manus laeva Christi,
Perforata quae fuisti
Pro peccato populi;

7 b. Et vos, pedes crucifixi,
Clavo iuncti, ligno fixi,
Ut salventur miseri.

8 a. Dulce vulnus laterale,
Ave, salve, gaude, vale,
Factum Longini lancea,

8 b. Per quod sumus liberati,
Emundati a peccati
Criminisque macula.

9 a. Qui passus es haec omnia
Et alia quam plurima,
Condona nostra crimina.

9 b. Sint Iesu, Dei filio,
Nunc gratiarum actio,
Decus, honor et gloria.

10 a. Ergo [te] nunc, crucifixe,
Supplicamus perobnixe,
Tuum ut martyrium

10 b. Pro nobis satisfaciat
Deo patri, qui conferat
Tecum nobis gaudium.