BALTH. CORDERII, S. J. INTERPRETATIO.

Atque in illis quidem a supremo ad infima derivans oratio, pro mensura descensus ad proportionatam latitudinem extendebatur ; nunc vero ab inferioribus ad id quod supremum eminet, ascendens juxta modum ascensionis contrahitur, et post omnem ascensum penitus obmutescet, atque ineffabili (Deo) tota conjungetur.

et primo ponit ipsum modum, secundo movet quamdam quaestionem, et solvit, ibi (sig. 4), Dicis autem quare, etc.

Dicit ergo primo, quod in affirmationum tractatibus incipiens a superioribus, quanto magis descendebat, tanto dilatabat sermonem suum, secundum proportionem rerum, quae magis multiplicantur secundum quod magis elongantur a primo, et proprietates earum sunt magis notae nobis quam proprietates primarum : sed in negationibus, de quibus est nunc mentio, ascendimus ab inferioribus ad superiora, removendo omnia a Deo : et ideo secundum quod ascendimus,sermo noster contrahitur, id

est, abbreviato : quia pauca sunt, quae de illis comprehendimus, et ad ultimum quando omnia removerimus, totus sermo erit sine voce, quia unietur ei qui est ineffabilis, scilicet Deo, et propter hoc scientia dicitur mystica prae aliis, quia in occulto terminatur, de quo non possumus, omnibus remotis, aliquid decenter affirmare.

4