60. "In festivitate sanctae Hierusalem".

1 a. Manu plaudant omnes gentes
ad nova miracula ;

1b. Vicit lupos truculentos
agnus sine macula.

2 a. Paganorum nunc est facta
humilis superbia,

2b. Quam reflexit virtus Dei
ad nostra servitia.

3 a. O nova militia !
Paucis multa milia
Sunt devicta.

3 b. Venit haec victoria
A Christi potentia
Benedicta.

4 a. Ecce, signum est levatum
Ab antiqua praesignatum
Prophetia.

4 b. Quisquis portat signum crucis,
Dum requirit summi ducis
Loca pia.

5 a. Redde, sancta civitas,
Laudes Deo debitas.
Ecce, tui

filii et filiae
De longinquo

veniunt cottidie
Ad te, porta gloriae,
Pro culparum venia.

5 b. Ecce, honor debitus
Est sepulcro redditus.
Quod propheta

praesciens sic loquitur:
"Et sepulcrum

eius honorabitur."
Nunc munus resolvitur
Atque laudum hostia.

6 a. Crucifixum adoremus,

Per quem daemonum videmus
Destructa imperia.

6 b. Adoremus resurgentem,
Iter nobis facientem
Ad regna caelestia.

7 a. O imperator unice,

Quod inchoasti, perfice,
Ut sub tua custodia
Pax crescat et victoria.

7 b. Fac christianos crescere
Et impios tabescere,
Ut regna subdat omnia
Tua omnipotentia.