Acta Apostolicae Sedis - Commentarium Officiale614

Eius vero canonizationi prospiciens, Postulatio Causae sanationem, quae

eadem Beata deprecante divinitus patrata ferebatur, huic Congregationi de

Causis Sanctorum subiecit expendendam. Quae res pertinet ad Ginil Shaji

Ozhuthottiyil infantem, qui die 5 mensis Maii anno 1998, in civitate Kerala

iusto partu in lucem editus est. In ipso autem ortu animadversum est parvulo

pedes varos innatos esse, laevum vero graviore deformitate affici. Quod qui-

dem parentes una cum gynaecologa aliaque perita doctrice, quae pueros in

valetudinario curabat, suis ipsi oculis viderunt. Deinde vero infans, sedecim

diebus postquam natus erat, ad Universitatem Studiorum urbis illius, quae

Kottayam vocatur, traductus est, ubi medicus quidam in orthopaedica disci-

plina versatus, pedibus ad corrigendum aliquantulum tractatis, deformitates

modice imminuere valuit. Curatio denique intermissa est. Hinc in ambulando

puer externis pedum marginibus, plantis introrsum detortis, nitebatur. Die

autem 13 mensis Novembris anno 1999, parentes, sacerdote quodam auctore,

ad sepulcrum Beatae Alfonsae ab Immaculata Conceptione, quod est in loco

Bharananganam, natum adduxerunt, petentes ut, ipsamet ad Deum depre-

cante, parvulus sanaretur. Qui vero, eodem die vesperi, necopinato quidem,

pedibus recte insistens coepit ambulare. Inspectiones autem, quae deinceps

factae sunt, eiusmodi sanationem perfectam stabilemque fuisse confirmarunt.

Quo de casu, qui statim pro miro divinitus patrato habitus est, Exc.mus

Iosephus Pallikaparampil, Episcopus eparchialis Palaiensis, anno 2002 Inqui-

sitionem dioecesanam instruxit, cuius vis ab hac Congregatione de Causis

Sanctorum rata facta est per decretum die 6 mensis Iunii anno 2003 latum.

Deinde Consilium Medicorum, cum sederet die 23 mensis Martii anno 2006, in

communem sententiam venit sanationem celerrimam, perfectam, stabilem

fuisse, eandem vero ex arte medica explicari non posse. Subsequenti die 5

mensis Iulii Theologi Consultores in Peculiarem convenere Congressum; die

autem 9 mensis Ianuarii vertentis anni 2007, Patrum Cardinalium Episcopo-

rumque Sessio Ordinaria, Exc.mo Lino Fumagalli, Sabinensi-Mandelensi

Episcopo, Causae Ponente, gesta est. Et in utroque Coetu, sive Consultorum

sive Cardinalium et Episcoporum, posito dubio an de miraculo divinitus

patrato constaret, responsum affirmativum prolatum est.

Facta demum de hisce omnibus rebus Summo Pontifici Benedicto XVI

per subscriptum Cardinalem Praefectum accurata relatione, Sanctitas Sua

vota Congregationis de Causis Sanctorum excipiens rataque habens, hodierno

die declaravit: Constare de miraculo a Deo patrato per intercessionem Beatae

Alfonsae ab Immaculata Conceptione (in saec.: Annae Muttathupadathu), So-