67. In Assumptione BMV.

1 a. Flos excellens, flos beatus
Mundi pratis est sublatus,
Hac in die stat plantatus
Summo caeli solio.

1b. Luce floret hodierna
Flore iugi ad superna
Flos devectus et materna
Iura dat in filio.

2 a. Rubum ignis lator legis,
Virgam Aaron, sceptrum regis
David tenet hodie;

2 b. Vellus olim fusum rore
Rorem sentit novo more
Gedeonis acie.

3 a. Felix spina,
Felix rosa,

Huius spinae filia,

3 b. Quae divina
Gloriosa
Scandit domicilia.

4 a. Haec peccati caret spina,
Spinam undat virtus trina
Dans ex spinis lilia;

4b, Sine spina stat spinetum,
Fronde, flore, fructu laetum
Ex hac eius filia.

5 a. Arca virgam

Iuxta manna clausam servat,

5 b. Quo mors vitam,

Robur aetas non enervat.

6 a. Convivatur sub fervore
Domo senis Abrahae

6 b. Isaac victus in amore
Bathnelis filiae.

7 a. Haec fiscella Moysen natum
Undis datum exserit,

7 b. Dans Aegypto munus gratum
Mundo lumen aperit.

8 a. Throno sedet Salomonis
Pharaonis filia

8b. Et dotata caeli donis
Audit vocum milia.

9 a. Astat chorus angelorum
Ante thorum virginis,

9 b. Et concentus ornat chorum
Modulatu carminis.

10 a. In vestitu deaurato
Variata
Regnat, iuncta patri nato,
Mater nata

10 b. Et oblita domum patris
Propter natum
In supernae sinu matris
Fixit statum.

11a. Stat in portu

Noster portus,
Gaudet ortu
Noster ortus
Novo,
Per quem novum sentit ortum
Genus omne, quod exortum
Est ex Ada veteri.

11b. Iam pubescit
Odor florum,
Coalescit
Pigmentorum
Stilla ;
Turtur nostra gaudet pare,
Vitis hortum concordare
Nostro studet generi.

11 c. Botrus ille

Pendens ligno,
Inter mille
Solo signo
Datus,
Ad se vitam revocavit,
Quam post ortum dulcoravit
Ortu dignam conteri.

12 a. Ei, ei, eia,

Tripudient omnia ;
Stella maris, Maria,
Iam vivit in gloria.

12b. Eia, cantus intonet,
Dies laetus hoc monet,
Dies nostri sideris,
Dies, lumen tenebris.

13 a. Sublevamen miseris,

13b. Medicina funeris,

14 a. Dei sponsa, caeli stella,
Virgo, mater et puella,

14b. Nos in nobis sic debella,
Ne nos turbet mortis cella.