71. De V Gaudiis Beatae Mariae V.

1 a. Gaude, salutata,

Virgo fecundata,

Gabrielis ore.

1b. Gaude, sola parens
Pariendo carens
Materno maerore.

2 a. Gaude, quae compateris
Nato patienti,
Congaudens prae ceteris
Sibi resurgenti.

2b. Gaude tuo filio

Caelos ascendenti,
Gaudium qui praeparat
Virginali menti.

3 a. Gaude, quia filius
Te sumpsit propitius,
Ut caelo sublimius
Regnes coronata,

3 b. Et a trina machina
Venereris domina
Angelorum agmina
Superexaltata.

4 a. Per haec quinque gaudia
Sis, pia, propitia
Nobis dando veniam,

4 b. Ut caelestis patriae
Perfruamur requie,
Dona, mater, gratiam.