Acta Apostolicae Sedis - Commentarium Officiale640

Mense Februario anno 1943 tertio vocatus est ad militiam, quam ipse

iudicavit omnino alienam a statu suae christianae fidei. Idcirco pro Tertio

Reich pugnare recusavit, plene tamen conscius de periculis obeundis, ita ut

ipso tempore quo instrumentum subsignabat convocationis ad arma, assere-

ret: « Hoc actu subscribo quoque meam poenam capitalem ». Promptum ta-

men se praebuit ad operam praestandam apud valetudinarium exercitus, ut

auxilium dolentibus ferret. Sed hoc eius propositum acceptum non est. Mense

Martio anno 1943 comprehensus est et translatus in vincula prius urbis Lin-

ciae ac deinde Berolini.

Degens in carcere vexationes pertulit et tormenta, ut a fide catholica defi-

cere cogeretur; ille tamen firmiter sese opposuit, spe nisus aeternam vitam

assequendi. In oratione ac maxime in recitatione sancti Rosarii vim reperiebat

ad sic acerbam oppetendam tribulationem. Die 6 mensis Iulii anno 1943 morte

damnatus est et, reconciliationis sacramento et infirmorum unctione refectus,

Brandeburgi capitis amputationem passus est die 9 sequentis mensis Augusti.

Desiderium significaverat mortem subeundi ante sollemnitatem Assumptionis

Beatissimae Mariae Virginis, ut caelesti in gloria eam excoleret.

Populus Dei statim putavit eum verum fidei martyrem. Confirmatio

huius famae annorum decursu Episcopum Linciensem compulit ut anno

1999 Causam iniret beatifı́cationis seu declarationis martyrii, instruens In-

quisitionem dioecesanam, interrogatis antea, annis nempe 1989-1996, qui-

busdam testibus « ne pereant probationes ». Iuridicam huius Inquisitionis

validitatem adprobavit haec Congregatio de Causis Sanctorum per decretum

diei 3 mensis Octobris anno 2003. Exarata Positione, disceptatum est, ut de

more, de asserto martyrio Servi Dei. Prospero cum exitu, die 31 mensis Martii

anno 2006 actus est Congressus Peculiaris Consultorum Theologorum. Patres

Cardinales et Episcopi, in Sessione Ordinaria die 20 mensis Februarii huius

anni 2007 congregati, audita relatione Ponentis Causae, Exc.mi D.ni Pauli

Iosephi Cordes, Archiepiscopi titulo Naissitani, agnoverunt Servum Dei

Franciscum Jägerstätter in odium fidei interemptum esse.

De hisce omnibus rebus, referente subscripto Cardinali Praefecto, certior

factus, Summus Pontifex Benedictus XVI, vota Congregationis de Causis

Sanctorum excipiens rataque habens, hodierno die declaravit: Constare de

martyrio eiusque causa Servi Dei Francisci Jägerstätter, Christifidelis laici, in

casu et ad effectum de quo agitur.