91. De Beata Maria V.

1 a. Virgo, truces tres tortores
Tuos torquent servitores
Devastando bonos mores
Triplici gravamine:

1b. Caro lenis, hostis, mundus.
Longus, latus et rotundus,
Per quos mundus fit immundus
In trino fallamine

2 a. Pelle sordes, dum luctamur,
Nos iuvando, ne labamur,
Carne, mundo ne vincamur
Hostis aut temptamine.

2b. Lassis servis da solamen,
Trini hostis ne certamen
Nos devincat per luctamen
in trino luctamine.

3 a. Nusquam tribus terga dabunt,
Regis matrem qui rogabunt,
Sed constanter his obstabunt,
Hostibus certamine ;

3 b. Felix virgo, dimicantes
Et iuvamen exorantes,
In hac pugna fac constantes
Tuo consolamine.

4 a. Cito nobis da munimen,
Pravitatis ne nos crimen
Extra rectum trahat limen
Mortali peccamine,

4b. Maestis, ope destitutis,

Surdis, claudis, caecis, mutis,
O Maria, spes salutis
Restas medicamine.

5 a. Natum mirante natura
Contra cuncta carnis iura
Peperisti, virgo pura,
Sancto plena flamine;

5 b. Tus et dulcor omnis rei
Tibi cedit, mater Dei,
Forma quoque speciei
Maris atque feminae.

6 a. Hanc reginam deprecemur,
Ut non atris claustris demur,
Sed in fine consalvemur
iudicis examine;

6 b. Mundissima mater Dei,
Te rogamus, servi rei,
Fac nos ad aeterna vehi
Gaudia precamine.