92. De Beata Maria V.

1 a. Gloriosa Dei cella,

Quae es mater et puella,
In mundana nos procella
Tua salvet gratia.

1b. Gloriosa virgo pura,

Quae nos gravant mala cura,
Ne extremo die dura
Nos premant supplicia.

2 a. Gloriosa mater Dei,

Ad te spirant omnes rei,
Ut aeternae requiei
Fruantur solacio.

2 b. Gloriosa lux diei,
Nos consortes speciei
Tui nati, nostrae spei,
Fac precum suffragio.

3 a. Gloriosa et beatrix
Et humana mediatrix,
Tu divini verbi latrix
Maris sine semine ;

3 b. Gloriosa vitae datrix,
Tu caelestis imperatrix,
Nobis assis sublevatrix
Mortis in examine.