93. De Beata Maria V.

1 a. Christe, splendor Dei Patris,
Nobis servis tuae matris
Sic intus irradia,

1b. Ut in ipsa te laudemus,
Et laudantes conclamemus:
"Ave, plena gratia."

2 a. Ave, virgo, stella maris,
Ave, mater, omnis maris
In conceptu nescia.

2 b. Novo more, modo miro
Paris virum sine viro,
Lactas patrem filia.

3 a. Intrat auster et impleris,
Porta clausa salvis seris
Tam prius quam postea;

3 b. Sic intacta gaudes prole,

Sicut salva solet sole

Penetrari vitrea.

4 a. Ardens rubus visionis,
Madens vellus Gedeonis
Tua sunt praeconia;

4 b. Tu es templum Salomonis,
Tu es thronus cunctis thronis
Praefulgens in gloria.

5 a. Tu mons Sion, virga Iesse,
Tu convallis plena messe,
Per quam vivunt saecula.

5 b. Tu praeclarum sidus poli,
Tu subiecta vero soli,
Luna sine macula.

6 a. Tu candore cordis casti
Corporisque superasti
Nives, ebur, lilia.

6 b. Flos processit ex te candens,
Qui pro fructu palmam scandens
Ad se traxit omnia.

7 a. Tu assilus miserorum,
Causam agis oppressorum
In caelesti curia.

7 b. Advocata stas pro reis,
Ut succurras semper eis,
Qui sunt in angustia.

8 a. Iustos quidem clemens audis,
Nec iniustis tuae claudis
Pietatis viscera,

8 b. Quorum ad te spirant vota
Quique sua mente tota
Detestantur scelera.

9 a. O quam felix es, Maria,
Piae prolis mater pia,
Aurum carens scoria!

9 b. Cella mellis, plena faris,
Quam iucunda, quam suavis
Est tui memoria !

10 a. Turis odor et acerra,
Ferax vite, felix terra
Madens Dei pluvia.

10 b. Verae vitis ferens fructum,
Sara ridens, Evae luctum
Convertis in gaudia.

11a. Iure tibi clamat ''Ave
Liberatus Adam a Vac
''Perennis miseriae;

11b. Qui per Evam est seductus
Per Mariam est reductus
Ad te, pater gloriae.

12 a. Ergo sanctae trinitati,

De tot donis non ingrati,
Referamus gratias ;

12 b. Nec iam serpens nos seducat,
Sed,quae ducit, haecperducat
Nos ad agni nuptias.