95. De Beata Maria V.

1 a. O Maria, mater Christi,
Quae de sancto concepisti
Spiritu mirifice,

1b. Gabrieli credidisti,
Praemunita quo fuisti
Veritatis indice.

2 a. Verbo sacro mox repleta,
Spe concepta eius laeta,
Propter hanc laetitiam

2 b. Cum qua salus est concreta,
Veniente vitae meta
Spem salutis sentiam.

3 a. Naturalem contra morem
Peperisti salvatorem
Virgo, mater, filia.

3b. Tuae laudis ad honorem
Me praesume debitorem
Tua cum familia.

4 a. Tu de partu laeta tali
Mihi luce sis finali
Salus et solacium.

4 b. Ne sim flamma gehennali
Pro reatu criminali
Datus ad supplicium.

5 a. Mentem tuam perturbavit
Et dolorem provocavit
Sequens nati passio.

5 b. Sed te laetam restauravit
Et post letum confortavit
Eius resurrectio.

6 a. Virgo plena pietate,
Resurgentis novitate
Laeta, me laetifica;

6 b. Nec oppressum gravitate
Me repelli sinas a te
Loca sub luctifica.

7 a. Revelatus ascendebat,
Ascendentem subvehebat
Nubes super sidera.

7 b. Astra tenens eligebat

Sedem dignam, qua sedebat
Dei patris dextera.

8 a. Propter cuius elevamen
Tibi matri consolamen
Tua post gravamina ;

8 b. In extremis adiuvamen
Et ruinae relevamen
Esto mihi, domina.

9 a. Quarta vice laetabaris,
Quod in caelum levabaris,
Spes salutis hominum.

9 b. Quorum noxam recordaris
Et pro quibus deprecaris
Incessanter Dominum.

10 a. Cum medela noxae dirae
Mihi velis subvenire
Mortis in itinere;

10 b. Et, cum dies venit irae,
Quam quis nequit praeterire,
Noli me relinquere.