97.

De Beata Maria V.

1 a. Salve, sancta Dei parens,
Salve, luna nube carens,

1b. Salve, spiritalis cella,
Salve, mater et puella,

2 a. Salve, clara stella maris,
Salve, aulea regalis,

2 b. Salve, dulcis balsamita,
Christo prole redimita.

3 a. Tu secretum trinitatis,
Vas electum deitatis,
Tu es radix ligni vitae,
Ferens mundo fructum vitae.

3 b. Tu es mundi advocatrix,
Tu es nostra mediatrix,
Angelorum imperatrix,
Caeli, terrae reparatrix.

4 a. Tu solamen miserorum
Atque mater orphanorum,
Medicamen peccatorum,
Desiderium iustorum.

4b. Tu serpentis tortuosi,
Tu draconis monstruosi
Caput teris venenatum,
Pariendo Dei natum.

5 a. Tu in virga, tu in flore,
Tu in vellere, et rore,
Tu in rubo es signata,
Tu in porta figurata.

5 b. Te praedixit Ieremias,
Prophetavit Isaias,
Salutavit [te] Gabriel,
Concepisti Emanuel.

6 a. Ex te prodit sol aeternus,
Splendor patris coaeternus.

6b. Hic est alpha, quod est primus,
Et o, quod est novissimus.

7 a. Hic est lapis angularis,
Hic est noster salutaris,

7 b. Caro nostra, sanguis noster,
Frater noster, iudex noster.

8 a. Exoramus mente pia,
Nos exaudi, o Maria,

8 b. Natum placa, patrem ora,
Salvet nos in mortis hora.

9 a. In Ierusalem superna
Det frui pace aeterna,

9 b. Quo laetemur in gloria
Concinendo Alleluia.

10. Eia, salve, per saecula
Virgo mater perpetua.