Congregatio de Causis Sanctorum 1087

ACTA CONGREGATIONUM

CONGREGATIO DE CAUSIS SANCTORUM

RATISBONENSIS

Canonizationis Beatae Annae Schäffer, Christifidelis laicae (1882-1925)

DECRETUM SUPER MIRACULO

Beata Anna Schäffer die 18 mensis Februarii anno 1882 in vico Mindel-

stetten in dioecesi Ratisbonensi in Germania nata est. Iam inde a pueritia

spiritualibus virtutibus et orationi summopere intentam se ostendit atque

in domesticis operibus et scholasticis negotiis diligentissimam. Die 12 mensis

Aprilis anno 1893 Primam Communionem recepit, cuius in adiunctis hostiam

expiationis se fieri pollicita est. Vitam religiosam in aliquo instituto vitae

consecratae ducere desiderans, Beata, quae decimum tertium agebat aetatis

annum, propter condicionem pauperam familiae suae, immo vero post patris

praematuram mortem, varias apud domus tamquam ministra servitium

praestitit. Dum olim in officina lavatoria alicuius domus in loco Stammham

inerat, in aquae valde calidae et lixivii labrum, ruinam ductus foculi fumi-

gantis vitare enitens, perniciose delapsa est. Membra inferiora eius infausta

hac saevae ambustionis et coniunctae putredinis vastata sunt clade, quae

diris doloribus eam admodum vexavit. Inanes evaserunt suppeditatae curae.

Plus quam viginti enim annos vitam suam lecto degere coacta erat et atrocia

tormenta passa est, quibus dein convulsiones et musculorum conductiones

additae sunt. Anno 1925 de lecto cecidit et acre in cerebro subiit vulnus, quod

facultates vocis imminuit. Beata vero magis in dies Domino sese sociavit et

partem habuit in Eius mysterio Crucis. Cotidie Sancta Eucharistia refecta,

mysticis quoque rerum caelestium contemplationibus merita est honestari.