105. De Beata Maria V.

la. Sicut pratum picturatur
Et ver veris floribus.

1b. Mater Dei figuratur
Mysticis nominibus.

2 a. Haec est nostra Sunamitis,
Nostra tympanistria,

2 b. Via vitae, vera vitis,
Et cella vinaria.

3 a. Haec est sponsa Salomonis,
Fermentatrix femina,

3 b. Qua vetusta Pharaonis
Relevatur sarcina.

4 a. Haec lucerna, paradisi
Ostium et ianua,

4 b. Haec vervecis est occisi
genetrix ingenua.

5 a. Haec est scala, qua descendit
Calciata Deitas,

5 b. Haec est litus, ad quod tendit
Nostrae molis gravitas.

6 a. Haec est mundi medicina
Mundi purgans lolium,

6 b. Haec est rosa sine spina,
Castitatis lilium.

7 a. Haec est turris, quam vallavit
Incorrupta firmitas

7 b. Haec castellum, quod intravit
Sola verbi veritas.

8 a. Haec est scirpea fiscella
Parvulum excipiens,

8 b. Haec est parens et puella
Sine pare pariens.

9 a. Virga, virgo, nuncupans

Templum, vas, sacrarium,

9 b. Porta clausa, lux solaris,
Caeli luminarium.

10 a. Rubus ardens, madens vellus
Gedeonis area,

10b. Fons signatus, ferax tellus
Granum sine palea.

11a. Gemma, iubar, lac, talentum
Spes et laus prophetica.

11b. Cinnamomus, ros, unguentum,
Quo fugantur toxica.

12 a. Getta,nardus,mel,pigmentum,
Radix aromatica.

12 b. Palma, palmes, pavimentum,
Piscina probatica.

13 a. Botrus, uva, favus, hortus,
Thalamus, triclinium,

13 b. Arca, navis, aura, portus,
Luna, lampas, atrium.

14 a. Vitrum, arva, claustrum, cella,
Domus, aula, civitas,

14b. Flos, fenestra, lumen, stella,
Sol, aurora, claritas.

15 a. Tu columba, tu columna,
Tu vitta coccinea,

15 b. Christi altrix et alumna,
Tu Engaddi vinea.

16 a. Tui patris tu, Maria,
Mater es et filia.

16 b. Ergo patri, mater pia,
Natos reconcilia.