106. De Beata Maria V.

la. Salve, mater salvatoris,
Summi regis et rectoris,
Creatoris omnium,

1b. Per quem lucis et splendoris,
Dignitatis et honoris
Habes privilegium.

2 a. Tu columba portans floris
Ramum, fructum dans saporis,
Hoc est Dei filium;

2 b. Hic est pii fructus oris
Intus mundans, clamans foris,
Hoc est Dei filium.

3 a. Vox est vitae, vox clamoris,
Vox invicti pugnatoris
Invitans ad proelium;

3 b. Via, victus viatoris,
Vita, victor et victoris
Virtus, vitans vitium.

4 a. Pius, bonus cunctis horis,
Sicut magni sic minoris
Semper est refugium.

4b. Felix, quae tanti decoris
Fructum profers et dulcoris
Tam dulce remedium.

5 a. Claritatis et candoris,
Caritatis et fervoris
Tenes domicilium ;

5 b. Tu casti castrum amoris,
Tu vas fragrantis odoris,
Tu rosa, tu lilium.

6 a. Tu flos diversi coloris,
Tu domus imperatoris,
Tu regis palatium.

6 b. O lux immensi fulgoris,
Aufer, pia, nunc horroris
Inundantem fluvium.

7 a. Expelle naufragium

Torrentis interioris,
Dic columbae nuntium

7 b. Monstrans rami folium,

Et ostende post maeroris
Flumen lucis radium ;

8 a. Ducque post diluvium

Nos ad terram non terroris
Sed terram viventium,

8 b. Ubi non est studium

Laborantis nec laboris
Ulla spes, sed praemium;

9. Ubi non est taedium,
Sed perenne gaudium.