107. De Beata Maria V.

1 a. Summi regis micans aula,
Tuae prolis, hac in caula
Tibi vox laetitiae

1b. Celebs illud promit Ave,
Ave gratum et suave
Baiulumque gratiae.

2 a. Istud Ave terris Deum
Dedit atque caelis reum
Versa rerum facie.

2 b. Hoc evertit nomen Evae,
Grave quondam, modo leve,
Tunc poenae, nunc gloriae.

3 a. Hoc draconis caput trivit,
Verbum patris hoc vestivit
Servitutis specie.

3 b. Per hoc Ave petit ima
Celsior propago prima
Miranda manerie.

4 a. Hoc tenetur paradisus,

Per hoc nostrae noster risus
Adplaudit inopiae.

4b. Hoc in mari fit pons altus,
Per hoc Ave fiunt saltus
Ad caelos cotidie.

5 a. Istud Ave frequentemus,
Hoc te laeti salutemus,
O flos pudicitiae.

5 b. Ave semper, o Maria,
Dulcis, grata, mitis, pia,
Nobis assis hodie.

6 a. Virgo sapiens et laeta,
Humilis et mansueta,
Noverca superbiae;

6 b. Tu de fonte pietatis

Haustum siti praebe gratis
Humanae penuriae.

7 a. Vitae terret nos eclipsis,
Sed tu, quam apocalypsis
Commendat egregie,

7 b. Mulier amicta sole,

Peccatorum pressis mole
Confer opem veniae.

8 a. Pedibus sub cuius luna,
Educ nos ex hac lacuna
Faecis et miseriae.

8 b. Bis sex habens in corona
Stellas, nobis posce dona
Divinae clementiae.