Congregatio de Causis Sanctorum 1095

MARIANOPOLITANA seu ALBANENSIS IN AMERICA

Canonizationis Beatae Catharinae Tekakwitha, Christifidelis Laicae (1656-1680)

DECRETUM SUPER MIRACULO

Beata Catharina Tekakwitha anno 1656 in vico Ossernenon, nunc

Auriesopoli sub dicione Neo-Eboracensi, in Civitatibus Foederatis Americae

Septentrionalis nata est, e patre gentis mohawk et matre e nativorum indi-

genarum stirpe algonchina. Tabes quaedam variolae, quae universam eius

tribum vastaverat, familia eam quattuor annos natam orbavit, visum detur-

pavit et ingenti caecitate corripuit. Et cum ipsi protensis brachiis deambu-

landum esset, ne obicibus forte incursaret, hoc ex incessus more cognominata

est « Tekakwitha », scilicet iuxta nativorum sermonem « quae res obversas

amovet ». Beata, una dehinc et derelicta, ab avunculo suscepta est et, licet

asperrimis in rerum angustiis, in Christi fide, quam e matre didicerat, ita

perseveravit, ut, vicenaria ad baptismalem fontem ducta, nomen sumeret

Catharinae. Dulcis ac suavis animo, de omnimodis vexatis et morbo correptis

praesertim sollicita fuit et asperae vitam paenitentiae et paupertatis experta

est, Christi passioni perscienter ac soluta eligendi optione adhaerendi avida.

E tribu abscessit, ut impedimenta et calumnias etiam fugiret, et Missionem

Sancti Francisci Xaverii adepta est, apud Pratum Magdalenae, uti dicunt,

nunc prope Marianopolim in Canadia, ubi vitam in tranquillitate animi

consumpsit: in agresti tugurio opera exercebat et vici assidue frequentabat

ecclesiam, non solum celebrationum, sed etiam adorationis eucharisticae

causa. Virginitatis confirmavit propositum et sponsum suum unum Christum

habuit. Artium immobilitate demum praepedita, sancto viatico e manibus

missionariorum recepto, Catharina Tekakwitha, lilium Irochensium, uti

nuncupabatur, fama sanctitatis circumfusa Saltu in Quebecensi provincia

Canadiae die 17 mensis Aprilis anno 1680 pie in Domino quievit.

Summus Pontifex Ioannes Paulus Secundus die 22 mensis Iunii anno 1980

eam in numerum Beatorum rettulit.

Canonizationis respectu, Causae Postulatio iudicio huius Congregationis

de Causis Sanctorum assertam subiecit miram sanationem pueri Iacobi Fink-

bonner, qui, sex annos natus, die 11 mensis Februarii anno 2006, pedamen

fortuito allidens infandum sibi in labio intulerat vulnus. Postridie eius diei,