108. De Beata Maria V.

la. Ave, stella matutina,
Lilium munditiae,
Cella fulgens cristallum,
Myrtus temperantiae.

1b. Mater regis et regina
Caeli, carens carie,
Trahe tuos a ruina
Dono tuae gratiae.

2 a. Ex te prodit, o Maria,
Verbi pura veritas,
In te sistit tunc sophia,
Praeradians deitas.

2 b. Vale, vita, lex et via,
Virginalis castitas,
Sola mundo praees pia,
Salvificans claritas.

3 a. Cella clausa creatoris,
Manna nos reficiens,
Claustrum flaminis dulcoris,
Splendor indeficiens;

3 b. Rosa fragrans, vas odoris,
Ad te currit sitiens,
Pondus abicis languoris
Gaudium parturiens.

4 a. Thronus candens Salomonis
Clarificans sidera,
Vellus rigans Gedeonis,
Nostra terge scelera;

4b. Rubus mirae visionis,
Succurrere propera,
Quos mendicos in spe ponis,
Nato tuo foedera.

5 a. Eia, dulcis advocata,
Tutrix et refugium,
Iure matris impetrata
veniae des bravium.

5 b. Ut per te sint nobis lata
Maestis in auxilium
Regna, quibus sedes grata
Civium caelestium.