109. De Beata Maria V.

1 a. Maiestatis trinae cella,
Reparatrix hominum,
Caelestia fundens mella,
Dulcis virgo virginum
Dominum
Parit, lumen luminum.

1b. Clausa Moysi fiscella,

Purgans labem criminum,
Per te loti, maris stella,
Mutans Evae nominum,
Fluminum
Unda, viri sanguinum.

2 a. Refutato munere

Ioachim contristatur,

Cum Mariam parere
Gabriel Annam profatur

Coniugali foedere;

2 b. Nazareth revisere

Parans virgo generatur;
Coepit ipsa nubere,

Caelo Gabriel legatur,
Tum virga frondescere.

3 a. Rubus ardendo virescit,
Iordanis contrahitur,
Aaron virga frondescit,
Amygdalum paritur,
Holofernes caeditur,
Iudith mascla legitur;

3 b. David fortis praevalescit,
Goliath occiditur;
Nam Deus abesse nescit
Iustis, per quos colitur,
Alithia fruitur
Palma, hostis vincitur.

4 a. Sub figuris figurata
Christi natalitia,
Dum Gedeonis rigata
Vellera sunt pluvia,
Virent aridantia.

4b. Patrem suum gignens nata

Sine repugnantia,

Rex novus, lex renovata,

Terra Dei gratia

Profert mirabilia.

5 a. Eia, mater caritatis,
Fons misericordiae
Exemplar munditiae
Lux immensae sanctitatis,
Porta regis gloriae,

5 b. O regina castitatis,
Ancora iustitiae,
Purgare nequitiae
Nos digneris a peccatis
Rore tuae gratiae.