110. De Beata Maria V.

1 a. Fragrans custosunguentorum,
Stillans stillicidium
Balsami, nardus odorum
Aromatizantium,
Cinnamomi lilium,

1 b. Hortus clausus, fons hortorum,
Florens viridarium,
Vernans pratum veris florum,
Virens ver laetantium,
Rosa serens lilium.

2 a. Haec est virgo gloriosa,
Mater salutifera,
Super cuncta speciosa,
Trinitatis camera,
Plus quam sol lucifera.

2 b. Regem caeli gaudiosa
Genuit puerpera,
Peperit Deum iocosa ;
Beata sunt viscera
Virginis et ubera.

3 a. Haec finis miseriae,
Gratiae principium,
Fons misericordiae,
Medela languentium,
Divinum auxilium.

3 b. Imperatrix gloriae,
Regina caelestium,
Patens porta veniae,
Peccatorum omnium
Salus et refugium.

4 a. Salve, rutilans aurora,
Lux deliciosa,
Mater Dei gratiosa,
Gratiam implora,
Nos rore caeli rora.

4 b. Natum pro nobis exora
Prece pretiosa,
Libera nos ab exosa
Morte sine mora;
Adesto mortis hora.