111. De Beata Maria V.

1 a. Hilarescat mens devota,
Et patescat voce vota
In Mariae laudibus.

1 b. Evanescat gens ignota
Et poscat virtute tota
Exui criminibus.

2 a. Virgo pura

A labe vitii,
Et structura

Miri palatii,
In te iura

Novi commercii
Celebrantur,

2 b. Tu cultura

Summi consilii
Sis ventura

Aeterni filii,
A te dura
Vis puerperii
Elongatur.

3 a. Lumen clarum oritur
Mundo tenebroso,
Honor verus redditur
Homini proboso
Per mediatricem.

3 b. Lumen mortis frangitur
visu virtuoso,
Iter vitae panditur
Servo venenoso
Per advocatricem.

4 a. Salve, mater gratiae,
Fons misericordiae,
Purgativa sceleris ;

4 b. Ave, lux munditiae,
Regula iustitiae,
Obtentiva muneris.

5 a. Stella maris
Appellaris

Dirigens per devium ;

5 b. Veneraris
Et rogaris

Conferens remedium.

6 a. Tribulatis

Das solamen

Per virtutis meritum,

6 b. Sauciatis

Medicamen

Per salutis pretium.

7 a. O regina generalis,
Tua prece triumphalis
Detur nobis et legalis
De bello victoria,

7 b. Ne sentina infernalis,
Ubi dolor non finalis,
Nos involvat, sed vitalis
Tribuatur gloria.