Congregatio de Causis Sanctorum 1101

SPOLETANA

Beatificationis et Canonizationis Ven. Servae Dei Mariae Aloisiae Prosperi

(in saec.: Gertrudis), ex Ordine Sancti Benedicti Abbatissae monasterii Sanctae

Luciae Trebiani (1799-1847)

DECRETUM SUPER MIRACULO

Venerabilis Serva Dei Maria Aloisia Prosperi (in saeculo: Gertrudis), in

parvo vico Folliano prope Perusiam in Italia die 19 mensis Augusti anno 1799

nata est. Iuventutis tempore, Deo se consecrare statuit et monasterium Sanc-

tae Luciae Ordinis Sancti Benedicti Trebiense ingressa est, intra fines Archi-

dioecesis Spoletanae, in quo Mariae Aloisiae Angelorum a Sacratissimo Corde

Iesu sumpsit nomen. Officia infirmorum ministrae, oeconomae, sacristae,

educandarum magistrae atque ostiariae illic exercuit. Anno 1837, abbatissa

electa est, quater concatenatis renovatis mandatis. Illis in annis Venerabilis

Serva Dei omni virium spiritusque ope enixam pro gloria Domini et regularis

intra moenia monasterii conversationis restauratione navavit operam et su-

premum humilitatis, purissimae erga proprietates vitae claustralis fidelitatis

et perfectae cordis libertatis cotidie perhibuit testimonium. Anno 1847, in

Dominica in Palmis de Passione Domini, adversa valetudine vehementer

correpta, quae, a medicis uti pergravis inflammatio chronica recognita, reli-

quam eius in hoc mundo peregrinationem intime comitata est. Die 12 mensis

Septembris eodem anno, Trebiae pie in Domino quievit. Die 1 mensis Iulii

anno 2010, Summus Pontifex Ioannes Paulus II professus est eam virtutes

theologales, cardinales iisque adnexas in modum heroum coluisse.

Beatificationis respectu, Causae Postulatio iudicio huius Congregationis

de Causis Sanctorum assertam subiecit miram sanationem dominae Carolae

Arcangeli, quae, die 11 mensis Februarii anno 1989, duodequinquagesimum

aetatis agens annum, arteriae cerebri dilatatione seu aneurysmate correpta

est exitiali cum sanguinis profluvio et conscientiae amissione. Summa ergo

urgentia in valetudinarium Fulginense advecta est et, primis modo suppedi-

tatis curis, in Perusinum, ubi, in loculamentum valetudinarii intensivis cu-

rationibus sepositum translata, comatis lethargo consopivit. Et licet parvula

refectionis leniter apparerent signa, chirurgicae tamen sectioni eam commit-

tere medici decreverunt.