117. De Beata Maria V.

1. Salve, virgo singularis,
Mater Dei, stella maris,
Via viris invia.

2 a. Virga Iesse tulit florem,
Et flos fructus dans odorem
Mundoque remedia.

2 b. Sic Maria gignit prolem,
Id est Christum, verum solem,
Sed doloris nescia.

3 a. Exit virgo de Iudaea
Ut de spina flos vinea,
Verbi Dei baiula.

3 b. Vas electum summi regis
In quo mansit dator legis,
Ortus ante saecula.

4 a. Puer natus ex Maria
Mundum regit et maria
Cum forti potentia.

4 b. Venit a patris solio,
Sedet in matris gremio
Dei sapientia.

5 a. Hoc, quod erat, non exuit,
Sed, quod non erat, induit
Infans sugens ubera,

5 b. Qui sumpsit formam hominis,

Servat pudorem virginis

Et intacta viscera.

6 a. Nux de virga progreditur,
Qua semper mundus pascitur
Dei providentia.

6 b. Processit nux ex Maria,
Id est Christus ex filia
Spiritali gratia.

7 a. Esto nobis, o benigna,
Pia mater, laude digna,
Solvens nostra vincula ;

7 b. Natum tuum placa nobis,
Quem exspectat totus orbis
Iudicare saecula.

8. Christus fecit de te matrem,
Ut commendet apud patrem
Nos in caeli gloria.