120. De Beata Maria V.

1 a. Gaude, virgo, mater Christi,
Qui te fecit, genuisti
Et post partum permansisti
Virgo lactans filium.

1 b. Vas honoris et virtutis,
Iugum primae servitutis
Contrivisti et salutis
Contulisti gaudium.

2 a. Praeelecta feminarum,
Consolatrix animarum,
Extersisti, quod amarum
Evae pomum contulit.

2b. Caelum, terram maiestate
Qui circumdat, potestate
Sua usus, brevitate
Loci claudi voluit.

3 a. Praesignata per prophetas,
Te collaudat omnis aetas,
Infra tui ventris metas
Quod portasti Dominum.

3 b. Novo rubus ardet more,
Irrigatur virga rore,
Fecundatur virgo flore
Ad tantum mysterium.

4 a. Mundi salus es, Maria,
Orphanorum mater pia,
Aegris salus, caecis via,
Et lapsis remedium.

4 b. Tu reatum, quem veremur,
Clemens terge, ne damnemur,
Sed ad vitae sublevenmur,
Tua prece, solium.