123. De Beata Maria V.

1 a. Angelorum laude digna,
Virgo clemens et benigna
Virgo, mundi gaudium,

1b. Condescende nostrae laudi
Et servorum voces audi
Tibi supplicantium.

2 a. Audi voces, audi vota,
Quibus orat plebs aegrota
Per te sanam fieri

2 b. Et virtutum post ruinam
Dari nostri medicinam,
Qua sanantur miseri.

3 a. Nulla salus erit reis,

Nisi per te detur eis

Criminum remissio.

3 b. Tu es salus et medela,
Tu solamen et tutela
Deditis exsilio.

4 a. Hic per Evam exsulamus,
Hic punimur, hic gustamus
Mille mortis pocula;

4 b. Sed tu, virgo labe carens,
Quae paravit prima parens,
Reprimis pericula.

5 a. Mater casta, mater Christi,
Morem gere, quem geristi
Semper in clementia;

5 b. Miserantis morem gere,
Miserorum miserere
Miseranti gratia.

6 a. Si non esses miserata
Culpae nostrae, invocata
Non fuisses totiens.

6 b. [lnfocaris] ac dimittis,
Quia pia, quia mitis,
Dulcis et [eompatiens].