134. De sancto Adalardo.

1 a. Celebranda
laude debita
dies est meritis
Adalardi dicta.

1. Votis [laeta]
pulset organa
erumpens in laudes
mentis laetitia;

2 a. Confessorum Domino
resonet prae concordia,

2 b. Per quem suis stipatur
civibus urbs uranica.

3 a. Vir regius

sese considerans,

ne degener haberetur,

contempsit regalia.

3 b. Miraculis,

professus monachum,
quas meruit, effulsere
virtutum insignia.

4 a. Eius igitur

merito canuntur
festa praeconia,

4b. Cuius spiritu
caeli triumphante
laetatur curia.

5 a. O beate Christi miles,
[o] Adalarde,
cuius instat
sollemnitas praeclara,

5 b. Te petimus, ut possimus
tuo obtentu
fulti vitae
assumere pascua,

6 a. Quo pascuntur,
iuveras inopes
quos caritatis
ope gemina

6 b. Cum de paucis
qui novit panibus
plus quam pascere
quinque milia

7 a. De fratrum victu
sollicito
providit cibaria.

7 b. Virtutes cuius
prosequimur,
iuvent nos et merita

8. Et nunc et in saecula.