137. De sancta Agnete.

1 a. Agnetis sollemnio
Iubilet cum gaudio
Castitatis filio
Mundus amor;

1b. Cordis in altario
Agnam agno socio
Immolet devotio,
Verus clamor.

2 a. Iesum rosam, lilium,
Sponsum vult et socium,
Et praefecti filium
Dedignatur ;

2 b. Preces, minas nimium
Spernit et supplicium,
Sustinendo spolium
Non nudatur.

3 a. Crinis arte deica
Tegit toga caelica,
Cella fit vivifica
Impurorum ;

3 b. Impudicus moritur,
Per pudicam redditur,
Christum, fidem loquitur,
Vim iustorum.

4 a, Ignibus exponitur,
Orat nec comburitur,
Gladio percutitur
Impiorum ;

4b. Sic Agna coniungitur
Agno pro quo caeditur,
Regia eripitur
Vi morborum.

5 a. O flos pudicitiae,
Speculum munditiae,
Amoris, constantiae
Fulcimentum,

5b. Hostia munditiae,
Victima iustitiae,
Dulcoris et gratiae
Condimentum.

6. Tuae vernant nuptiae,
Agni fruens specie,
Propago laetitiae
Complementum.

7. O plena dulcedine,
Agni rubens sanguine,
Pellas a certamine
Nocumentum.

8. Agni pollens agmine,
In mortis examine
Sis cum matre virgine
Tutamentum.

9. O felix agnicula,
Agnes, prece sedula
Nostra fac piacula
Expiari.

10. Duc ad agni pabula,
Pastorissa parvula,
Agno caeli copula
Salutari.