141. De s. Angelo Custode.

1 a. Beatorum angelorum
Custodumque viatorum
Cantemus praeconia,

1b. In cordibus devotarum
Atque vocibus cunctorum
Laus sit cum laetitia.

2 a. Non pressa carnis pondere,
Pura a culpae scelere
Ipsorum substantia.

2b. Nobis assunt in opere,
Hic virtuose vivere
Dant horum praeconia.

3 a. Horum ex donis internis
Et ordinibus ter ternis
Patet differentia,

3 b. Horam actibus externis
In terrenis et supernis
Panduntur officia.

4 a. Malis praesunt spiritibus,
Potentes in virtutibus
Miranda potentia.

4 b. Nostris infirmitatibus
Et periculis omnibus
Dantur pro custodia.

5 a. Mundi huius sunt rectores,
Protectores, consultores
Dei providentia.

5 b. Quamvis nostri sunt tutores,
Semper tamen inspectores
Dei in essentia.

6 a. Semper fruuntur decore
Summi regis et amore,
Iucunda concordia.

6 b. Cernunt in eius splendore,
Resplendent tanto fulgore
Mira refulgentia.

7 a. Hos fervide imitemur
Et ipsorum contemplemur
Summa privilegia.

7 b. Hos devote veneremur,
Ut cum ipsis gloriemur
In caelesti patria.