153. De sancto Augustino.

1 a. Gaude, turba clericorum,
Festum agens gaudiorum
Augustini praesulis.

1b. Patris tui singularis,
Cuius digne veneraris
Diem annis singulis.

2 a. Hunc exortum matre pia
Nutrivit philosophia
Mammis liberalibus,

2 b. Quem intrantem mundi vias
Mater plangit, preces pias
Offerens cum fletibus.

3 a. Huic responso dato fore
Tantarum hunc non perire

Lacrimarum filium,
Terra, mari sequens natum
Adeptura iam optatum

Venit ad Ambrosium;

3b. Per quem ille mox mutatur,
Sed non statim baptizatur,

Donec voce caelica
Iussus Pauli scripta legit,
Quibus a se mox abegit

Cuncta carnis lubrica.

4 a. Patre tandem destitutus
Adit sua, scrutans tutus
Veritatis studium.

4 b. Mox fit clavis veri David,
Quae cunctorum reseravit
Quaestiones artium.

5 a. Cuius apex scripturarum
Sensum nobis prophetarum
Mysticum aperuit.

5 b. Ergo laus sit Iesu Christo,
Qui defectum sic in ipso
Cherubim restituit.

6 a. Hinc exemplo tam insigni
Vita, verbo simus digni
Spernere terrestria.

6 b. Patris prece muniamur,
Eius ut efficiamur
Concives in patria.