154. De sancto Augustino.

1. Sancti Augustini
merita magnifica

2. Redemptoris cum gloria
celebret dignis laudibus
ecclesia.

3 a. Qui natus sacculo
in Africa,

sed renatus Christo
est in Italia:

3 b. Quem sanctus convertit
Ambrosius.
Ergo totus plaudat
orbis catholicus.

4 a. Nam divina
providentia
divisit decori
domus spolia.

4 b. Gemit capta
plebs haeretica,
proprio mucrone
caeso Golia.

5 a. Gaudent ecclesiae agmina
verum David
sequentia,

5 b. Augustini quae per dogmata
liberatur
perfidia.

6 a. Hic namque

est vitae lucerna

candelabro

superposita,

6 b. Doctrina

cuius luciflua
pandit iter
ad caelestia.

7 a. Inflantem scientiam

mundi sprevit, sophiam,
assectans Christianam
theologiam,

7 b. Christi post vestigia
via tendens regia;
cum probasset omnia,
tenuit bona.

8 a. Ergo canonicam

sciens esse apostolicam

8 b. Vitam instituit

et clericorum forma fuit.

9 a. Nil quaerens proprium
commune solum
bonum omnium
possidebat, Deum.

9 b. Hanc unam petiit,
hunc fontem vitae
semper sitiit,
quo et potus fuit.

10 a. Augustinus,
Dei plenus
amore, scientia,

10 b. Cum Cherubim
et Seraphim
pollens nunc in gloria

11. Petat vitam
nobis aeternam.